Dacia Aureliana (et postea Dacia) fuit provincia Romana, anno 270 aut 271 condita et e partibus provinciarum anteriorum Moesiae Inferioris, Moesiae Superioris et Thraciae in dextra ripa fluminis Danubii constituta. Ea provincia stetit in situ nec antiqui regni Dacorum nec provinciae Daciae a Traiano statutae; nomen trahit aut e populis provinciae transdanubianae Trium Daciarum, qui, Romanis inde anno 271 discedentibus, hic refugium habebant, aut e legionibus transdanubianis quae hoc anno in Daciam Aurelianam castra removerunt.
Anno 395 (aut fortasse antea) haec provincia divisa est sub nominibus "Daciae Mediterraneae" et "Daciae Ripensis".